GENERAL SANTOS CITY – Gikonsidera sa militar nga dakong kawad-on sa grupo sa mga rebelde nga galihok sa Lebak, Sultan Kudarat ang pagsurender sa 21 ka mga miyembro sa New People’s Army (NPA) sa mga otoridad.
Sa nahimong pakighinabi sa Bombo Radyo GenSan kang Lt.Col. John Paul Baldomar, tigpamaba sa 6th Infantry Division Philippine Army, gibutyag niini nga kauban sa 21 nga nagsurender ngadto sa pamunuan sa 603rd Infantry Brigade ang ilang lider nga si Kumander Tats, ilawom sa Dragon Fruit Platoon sa East Dagoma Front.
Gibitbit sa mga nasampit atol sa pagtahan sa ilang kaugalingon sa kasundalohan ang 21 ka mga lain-laing matang sa armas.
Nagtukmod sa mga kanhi rebelde nga mukanaog na sa patag tungod sa kalisod og kahadlok nga nasinatian samtang anaa sa kalihukan og wala usab gituman sa mga nag-recruit kanila nga mga NPA ang daghang butang nga gisaad kanila.
Sa pamahayag ni LtCol. Baldomar nga dakong kawad-on kini sa NPA hilabi pa na ang 21 ka miyembro ang pulos mga combatants.
Gipailawom gilayon ang mga NPA surenderees sa processing og debriefinges samtang nakadawat ang matag usa kanila og mga pasiunang hinabang aron makasugod og subling mubalik sa normal ang pagpuyo kauban ang ilang tagsa-tagsa ka pamilya.
