GENSAN – Usa ka diversionary tactic ang pagpasaka og nagkadaiyang mga kaso batok kang Vice President Sara Duterte.
Matod ni Atty. Rogelio Garcia nga klaro nga ang mga ebidensya sa gikawat nga pondo sa gobyerno ug adunay mga testigo nga mibutyag sa nagkadaiyang anomaliya, apan imbis nga tutukan kini, gilihis ang isyu ngadto sa Bise Presidente.
Sumala pa niya, balik-balik na ang maong isyu sulod sa duha ka tuig sukad sa paghawa ni VP Duterte sa administrasyon ni President Ferdinand “Bongbong” Marcos Jr. ug gihimo lamang kini aron malikayan ang mas seryosong mga alegasyon sa korapsyon nga naglibot sa pipila ka proyekto sa gobyerno.
Dugang pa ni Garcia, mas angay tutukan sa gobyerno ang lawom nga imbestigasyon sa mga anomaliya sa flood control projects sa nasud.
Iyang giingon nga kinahanglan magpokus ang awtoridad sa pagsusi sa mga opisyal sa Department of Public Works and Highways, mga kontraktor, mga kongresista, mga gobernador ug mga mayor nga giingong responsable sa pagpangawat sa pondo sa katawhan.
Matod pa niya, ang tinuod nga hustisya alang sa katawhan magsugod sa pagpanagot sa mga opisyal nga nalambigit sa klaro ug dagkong anomaliya, imbis nga gamiton ang isyu batok sa Bise Presidente aron tabunan ang mas dakong problema sa korapsyon sa gobyerno.
