Gibutyag sa Bureau of Immigration (BI) nga kapin 1,400 ka mga langyaw ang gi-deport sa Pilipinas sa unang unom ka buwan ning tuiga 2025.
Kini tungod sa mas gipakusgan nga kampanya batok sa mga langyaw nga nakalapas sa balaod sa imigrasyon.
Sumala ni BI Commissioner Joel Anthony Viado, ang maong lakang ang base sa mando sa presidente nga dali nga dakpon ug pauli-on ang mga langyaw nga posibleng hulga sa seguridad sa nasud o sa katawhan.
Base sa datos sa Deportation and Implementation Unit (DIU) sa BI, gikan Enero hangtod Hunyo 2025, 1,422 ka foreign nationals ang gi-deport.
Ang labing daghan sa listahan mao ang mga Chinese national nga mukabat og 957, gisundan sa:
231 ka Vietnamese
41 South Koreans
41 Malaysians
37 Burmese
Kadaghanan kanila ang nasakpan nga iligal nga gatrabaho sa mga POGO companies, bisan pa nga gibawal na ang operasyon sa POGO sa nasud.
Gipadayag usab ni Commissioner Viado nga doble ang gidaghanon sa mga gi-deport karon kumpara sa 717 ka deportees sa parehas nga panahon kaniadtong 2024.
