GENERAL SANTOS CITY -Gipaabot na lamang sa kapulisan nga mapagawas ang warrant of arrest batok sa suspek nga milugos sa dose anyos sa Glan, Sarangani Province.
Matud pa ni PO1 Jasmine Dakanay sa Women and Children’s Protection Desk sa Glan Municipal Police Station, napasaka na ang kaso niadtong Hunyo 9, 2017 human nga nakuhaan ug pahayag ang biktima nga si Alias Jane.
Base sa imbestigasyon, duha ka higayon nalugusan ang biktima sa suspek nga ang ulahi, naatigayon kaniadtong Mayo 9.
Kahibaluan nga sa pakighinabi sa Bombo Radyo sa biktima, gibutyag niini nga wala na makapalag dihang gilugos tungod gitiunan siya ug pusil sa suspek og gibaharang patyon.
Nahitabo ang pagpanglugos kaniya dihang giingnan sa suspek nga muadto sa balay niini tungod adunay kwarta nga gipadala sa iyang Inahan nga usa ka OFW.
Miuban matud pa kini sa suspek ug misakay ug sikad apan pag-abut matud pa sa balay sa suspek gibira siya niini ug gidala sa lawak ug didto gihubu-an ug gilugos.
Kahibaluan nga personal nga mianhi sa sibyahanan ang asawa ug anak sa 50-anyos nga suspek og gipanghimakak ang alegasyon sa dose anyos.
