GENERAL SANTOS CITY – Saulogon ang World Blood Donor Day karong Hunyo 14, nga usa ka kalibutanong adlaw sa pagpasidungog sa mga boluntaryong nagdonar og dugo nga naghatag og paglaum ug kinabuhi sa ubang tawo.
Matud ni Johnny Fuscablo sa Philippine Red Cross Gensan-Sarangani, ang maong selebrasyon gi
saulog matag tuig aron ilhon ang kaisug ug kalooy sa minilyon ka donors nga andam motabang bisan pa sa ilang kaugalingon nga kahimtang.
Karong tuiga, ang tema mao ang ‘Give blood, give hope: together we save lives.” Gipasabot ni Fuscablo nga ang maong kalihukan usa usab ka paalaala sa kahinungdanon sa paghatag og dugo sa kanunay.
Dugang pa nini nga ang pagdonar og dugo dili lamang makapabaskog sa lawas, kundili makahatag usab og higayon sa kinabuhi sa mga pasyenteng nagkinahanglan.
Gibutyag usab niya nga dugay na nga kasaligan nga kauban sa Philippine Red Cross ang Bombo Radyo pinaagi sa Dugong Bombo, usa ka nasyonal nga kampanya sa pagdonar og dugo nga padayon nga nagtabang sa pagtipon og dugang suplay alang sa mga ospital ug pasyente sa tibuok nasud.
