Giklaro sa legal counsel ni Vice President Sara Duterte nga si Atty. Paul Lawrence Lim sa Chua Lim & Associates nga walay nadawat nga espesyal nga pagtratar ang Bise Presidente atol sa iyang pormal nga booking procedure sa Quezon City Regional Trial Court.
Matud sa abogado, personal nga nagpasa ang Bise Presidente sa iyang kaugalingong litrato ngadto sa korte alang sa gikinahanglang rekord. Husto ug pormal usab nga gikuhaan si Duterte og fingerprints subay sa kasamtangang proseso nga gitakda sa balaod.
Samtang niini, pormal nang gikumpirma ni Lim nga lifted o nabawi na ang warrant of arrest nga gipagawas batok kang Duterte human siyang malampusong nakapahigayon sa pag-file sa hustong piyansa alang sa iyang kasong grave threats.
Ang pag-atubang sa Bise Presidente sa korte misunod sa naunang pahayag sa iyang legal team nga wala siyay tuyo nga mokalagiw o mosupak sa balaod , bisan pa man sa mga isyu nga nalambigit sa hurisdiksyon sa kaso.
Matud sa kampo ni Duterte, andam siyang mogamit sa tanang legal nga remedyo nga gitugotan sa balaod aron mapanalipdan ang iyang mga katungod.
Tungod sa paghain sa piyansa ug pagdeposito sa gikinahanglang kantidad sa korte, temporaryo nga nakagawas si Duterte ug wala makulong, samtang nagpadayon ang paghusay sa mga merito sa iyang kaso.
Bisan pa sa pagrespeto sa booking procedure, nagpabilin ang legal nga posisyon sa kampo sa Bise Presidente nga ilang panalipdan ang iyang mga katungod, ilabina may kalabotan sa mga isyu sa immunity ug due process sa pagpanubag sa usa ka impeachable officer.
