GENSAN- Nagpadayag og kabalaka ang mga residente sa Barangay Buayan tungod sa pila na kagabii nga walay suga ang mga poste sa kadalanan.
Sumala sa mga residente, aduna pay suga sa kadalanan sulod sa Barangay Lagao, apan pag-abot sa dapit padulong sa Buayan hangtod sa boundary sa Gensan ug Alabel, Sarangani Province, wala na magsiga ang mga poste.
Nabalaka ang mga residente nga mahimong hinungdan kini sa disgrasya, ilabina sa mga motorista nga nagabiyahe sa gabii.
Sumala pa sa pipila ka residente, nga nagduda nga basin may kalambigitan kini sa operasyon sa SOCOTECO II, nga maong nagadumala sa distribusyon sa kuryente sa dakbayan.
Nanawagan karon ang mga residente sa SOCOTECO II nga hatagan og aksyon ang problema aron malikayan ang posibleng disgrasya ug masiguro ang kaluwasan sa tanang nagalabay sa maong kadalanan.
