GENSAN- Malipayong gipahibalo ni Joseph Timothy Rivera , Bombo International Correspondent sa Qatar nga sulod sa tulo ka sunod-sunod nga adlaw, wala makasinati og bisan unsang pagpamomba o pag-atake ang nasod sa Qatar.
Kini usa ka dako nga kahupayan alang sa mga residente ug sa Filipino community human sa sunod-sunod nga kagubot sa rehiyon.
Bisan pa man sa nasinati nga kalinaw sa Qatar, gikataho nga nagpadayon gihapon ang pagpangatake sa militar sa Iran sa mga silingang nasod sama sa Kuwait, United Arab Emirates, ug Saudi Arabia, taliwala sa selebrasyon sa Eid al-Fitr.
Bisan tuod og hilom ang sitwasyon sa pagkakaron, gipahibalo ni Rivera nga nagpabiling alerto ang ilang “emergency preparedness” ug aktibo gihapon ang ilang alert systems.
Samtang, nagpabilin usab ang kabalaka tungod sa tagal ni US President Donald Trump nga naghatag og 48 ka oras sa Iran aron hingpit nga ablihan ang Strait of Hormuz, dungan sa bahad nga mopahigayon og dugang aksyong militar.
Taliwala sa hulga, ang Filipino community sa Qatar nagsugod na sa pagpahigayon og mga business events ug hinay-hinay nga pagbalik sa ilang naandan nga mga buluhaton, dungan sa paglaum nga hingpit na nga mobalik ang normalcy sa tibuok rehiyon.
