Gihagit ni Vice President Sara Duterte ang Palasyo sa Malacañang nga isapubliko ang tanang travel authority nga giisyu alang sa mga opisyal ug empleyado sa gobyerno.
Apil usab sa iyang gihangyo nga ipagawas sa publiko ang kantidad sa gasto sa gobyerno alang sa ilang mga biyahe, aron masiguro ang transparency ug accountability sa paggamit sa pondo sa katawhan.
Matud ni Duterte, ang pagpubliko sa maong mga dokumento ug travel expenses makatabang aron mahibal-an sa publiko kung kinsa ang mga opisyal nga mobiyahe, asa sila moadto ug pila ang gigasto sa gobyerno alang sa maong mga biyahe.
Ang maong panawagan gisang-at samtang nagpadayon ang mga diskusyon bahin sa paggamit sa pondo sa gobyerno ug sa panginahanglan sa mas dakong transparency sa mga transaksyon sa mga opisyal sa nasud.
