GENSAN– Gibutyag sa Commission on Elections o Comelec nga sa buwan sa Mayo 2026 pa magdagsa ang mga katawhan nga gustong magparehistro isip botante.
Sumala ni Atty. Jose Villanueva, Assistant Regional Director sa Comelec Region 12, sa pagkakaron gamay pa lamang ang turnout sa voter registration sukad nga giablihan pag-usab ang maong kalihukan.
Matud sa opisyal, ubos pa sa 9,000 ang narehistrong botante sa tibuok rehiyon, nga mas ubos kumpara sa ilang gilauman sa unang mga bulan sa registration period.
Bisan pa niini, giklaro ni Villanueva nga hapsay ug malinawon ang dagan sa voter registration ug walay bisan unsang dakong kakulian o problema nga natala sa ilang mga opisina.
Dugang pa niya, aktibo karon ang Comelec sa pagpatuman sa satellite registration sa nagkadaiyang lugar aron mas mapadali ug mas mapaduol sa katawhan ang proseso sa pagparehistro.
Busa, iyang giagda ang mga kwalipikadong botante, ilabi na kadtong wala pa marehistro, nga pahimuslan ang maong kahigayunan aron masiguro ang ilang partisipasyon sa umaabot nga piniliay..
