GENSAN– Misaka pa ang ihap sa mga vehicular accident sa dakbayan sa Gensan human matala ang 1,772 ka insidente sukad Enero hangtod Nobyembre ning tuig, base sa datos sa General Santos City Police Office – Traffic Enforcement Unit (GSCPO-TEU).
Sumala ni PLTCol. Patrich Elma, hepe sa TEU, adunay 54 katao ang namatay tungod sa maong mga aksidente.
Ang Oktubre maoy bulan nga pinakadaghan og natala nga aksidente nga misaka sa 206 ka kaso.
Nagpahimangno si Elma nga ang mga drayber kinahanglan mahimong modelo sa kadalanan pinaagi sa pagka-responsable ug disiplinado sa pagmaneho.
Giawhag niya nga magtuman sa balaod trapiko, lakip na ang speed limit, paglikay sa pag-inom ug pagmaneho, ug pagsul-ob og protective gear sama sa helmet alang sa mga motorcycle riders.
Padayon ang panawagan sa kapulisan sa publiko nga mag-amping pirmi sa kadalanan, ilabi na karong hapit na ang kapaskuhan.
