Napugos sa pagpahunong ang biyahe sa usa ka tren human nakakita sa drayber niini ang usa ka tawo nga natulog sa riles nga iyang agian sa Uttar Pradesh, India.
Sa taho gikaingon nga padulong sa Pratapgarh ang tren sa dihang ang lalaki nakit-an nga anaa sa mga riles sa Mau Aimma railway crossing sa lungsod sa Prayagraj, India.
Pipila ka metros gikan sa paghunong sa tren, nakita gayod sa drayber ang ulo sa lalaki nga nasandig sa mismong riles diin agianan gayod sa ligid sa tren.
May payong pa ang lalaki nga daw pangontra sa init nga morag way kabalaka sa kapeligrohan nga mahitabo kaniya. Maayo na lang kay nakit-an dayon sa drayber sa tren ang natulog nga tawo sa riles ug nakalikay sa usa unta ka trahedya.
Ang drayber mismo sa tren maoy minaug ug nagpukaw sa tawo aron makaagi na ang tren tungod may pasahero pa kini nga ihatud.
