SARANGANI PROVINCE -Nagkurog sa katugnaw ang mga residente tungod sa pag-ulan ug pagbaha nga nasinati-an sa upat ka barangay sa Alabel Sarangani Province tungod sa kusog nga pagbundak sa ulan kagahapong adlawa.
Unang nagpadangat ug taho ang taga Purok Cogonal, Poblacion pasado alas dos sa hapon nga nagresulta sa halapad nga pagbaha.
Apektado usab ang Barangay Ladol ug gikataho ang pagdahili sa yuta sa Brgy. Pag-asa.
Paghidangat sa alas 4:00 sa hapon nangayo ug tabang sa Municipal Disaster Risk Reduction and Management Office(MDRRMO)si Barangay Captain Rose Mae Orlino ug gikataho ang natigayong pagbaha sa Buenavista ug Sitio Sofan sa Brgy. Pag-asa.
Mikanaug sa ubos nga bahin ang tubig ug nakaabot sa Barangay Kawas, Alabel.
Matud sa MDRRMO nga ang pag-ulan nga nagresulta sa pagbaha ug landslide gumikan sa Localized thunderstorm.
Gilayon nga gipadala ang kapulisan sa pagpahigayon ug rescue operation ug padayon nga monitoring sa mga sapa, creek ug uban pang flood prone area.
Giactivate usab ang tanang barangay responders sa mga naapektuhan nga barangay isip force multiplier.
Nagpadayon usab ang assessment sa danyos sa mga butang ug pananum nga naguba gumikan sa pagbaha.
