GENSAN- Gipahibalo ni Atty. Jong Gonzales, labaw sa Public Safety Office sa Gensan nga mokabat na sa 8,600 ang nakarehistro nga mga traysikol nga adunay prangkisa, samtang ang target sa dakbayan anaa sa 9,000 ka units.
Apan, gibutyag ni Gonzalez nga 350 na lamang ka slots ang nahibilin alang sa mga aplikante nga gusto pa makakuha og prangkisa. Kung maabot na ang target nga ihap, awtomatikong hunongon sa dakbayan ang pagdawat og bag-ong aplikasyon.
Tumong niini nga masiguro nga dili molapas sa gitakdang kapasidad ang mga traysikol nga nagdagan sa kadalanan, ug malikayan ang sobra nga kompetisyon ug trapiko.
Matud pa ni Gonzales, target sa opisina nga sulod sa duha hangtod tulo ka bulan, puro na yellow plates ang makita nga nagdagan sa kalsada alang sa mga pampublikong traysikol.
Ang yellow plate magsilbing opisyal nga timaan nga ang maong traysikol adunay legal nga prangkisa ug rehistrado sa dakbayan.
Giklaro usab nga ang mga private traysikol nga gigamit lamang sa pamilya dili sakop sa maong prangkisa, apan gikinahanglan nga ilisan ang kolor sa side car niini ngadto sa purple aron mailhan nga dili kini pangnegosyo o pampasahero.
Pahimangno sa opisyal nga kon magpadayon ang usa ka traysikol sa paggamit og green plate bisan wala na kini sakto nga klasipikasyon, posible kining dakpon sa mga awtoridad.
