Nahimong sentro sa ika-14 nga adlaw sa impeachment trial ni Vice President Sara Duterte karong Martes, Agosto 11, ang mga “unusual” o dili kasagarang ngalan nga makita sa acknowledgement receipts o ARs sa confidential funds sa Office of the Vice President.
Gipresenta sa House prosecution panel, ubos sa pagpanguna ni Atty. Lorna Kapunan, ang mga resibo nga adunay mga ngalan sama nila Pia Piatos-Lim, Ralph Josh Bacon, Feonna Villegas ug Clarisse Hontiveros, nga giingong nakadawat og nagkalain-laing kantidad alang sa impormasyon, medical ug food aid, ug uban pang operasyon.
Migawas usab ang mga ngalan nga daw parehas sa mga apelyido sa pipila ka sikat nga politiko, lakip sila Jose Diokno Jr., Diane Maple Lapid, Beth Revilla ug Kristine Applegate Estrada.
Aduna usab mga ngalan nga daw gikan sa pagkaon sama nila Beverly Claire Pampano, Matthew N. Keso, Jay Kamote ug Miggy Mango, nga gibinuangan sa prosecution nga daw “fruit salad” o listahan sa merkado.
Samtang, gipangutana ni Kapunan ang COA State Auditor nga si Xylene Mae Del Campo kung iyang gipanghimatuud ang mga ngalan sa ARs, apan matud sa testigo, dili sakop sa iyang compliance audit ang pag-verify sa identidad sa mga tao nga nakalista sa mga resibo.
Gikumpirma usab ni Del Campo nga ang mga resibo alang sa “rewards” walay kalakip nga pruweba nga malampuson ang operasyon, samtang ang mga resibo alang sa “supplies” walay klarong detalye kung unsa ang mga gipamalit.
Padayon karon ang Senate Impeachment Court sa paghisgot sa Article 1 sa impeachment complaint nga may kalabotan sa giingong misuse ug systematic corruption sa ₱612.5 milyon nga confidential funds sa OVP ug DepEd.
