GENERAL SANTOS CITY – Nahimong “generally peaceful” ang unang adlaw sa filing sa certificate of candidacy o COC sa Region 12, kagahapong adlawa.
Kini ang impormasyon gikan sa Comelec 12, kung asa sa pakighinabi sa Bombo Radyo kang Comelec 12 Regional Director Atty Michael Abbas, kasagarang ginalangaw ang unang adlaw sa filing sa COC, sama sa mga nakalabay’ng adlaw.
Ug gani, nasayran nga dinhi sa siyudad, wala pa gayuy kandidato nga nag-file ug COC sa Comelec-GenSan. Samtang sa ubang siyudad, munisipyo ug probinsya sa SOCCSKSARGEN, aduna pa lamang pipila ug makonsidera gihapong gilangaw.
Luyo niini, gipasalig ni Atty Abbas nga andam ang tanan nilang mga buhatan sa tibuok rehiyon nga mudawat ug mga mag-file ug COC.
Kahibaluan nga ang filing sa COC nga nagsugod kagahapong adlawa, Oktobre 11, ug mulungtad hangtod sa Oktobre 17, walay apil ang Sabado ug Dominggo, ug wala dili na matud pa lugwayan pa.
Hinungdan nga gilaumang ang ubang kandidato ug partido ang posibleng sunod adlaw pa magfile sa ilang COC.
Samtang, gipahimangnuan usab ni Atty Abbas ang mga kandidato nga bantayan ug manduan daan ang ilang mga supporters nga magpuyo ug siguraduhon nga dili makasamok sa kalinaw ug sitwasyon sa buhatan sa Comelec.
Gihingusgan usab ni Atty Abbas nga panahon na aron magbag-o na mga botante ug sutaon ug maayo ang mga kwalipikasyon sa mga mukandidato sa umaabot nga midterm elections sa Mayo 2019.
Ug gani, nagpadayag ug pagdayeg ang Atty Abbas sa pahimangno sa Bombo Radyo sa katawhan nga sutaon gayud kon kinsa ang mga non-performing nga mga opisyales sa gobyerno, ug angayang huna-hunaon ug insakto kon angayan pa bang ibutang ug balik sa ilang posisyon.
Matud ni Atty Abbas, ang election period mao ang higayon nga gikonsidera nilang “job fair” alang sa mga buot natong pili-on nga ibutang sa nagkadaiyang lokal nga posisyon, apil na sa pagka-senador.
Nanawagan si Atty Abbas ngadto sa mga buot mukandidato nga dili na hulaton ang ulahing adlaw, ug sayuhan na ang pagfile sa ilang COC, aron mas mahimong hapsay ang sitwasyon.
Gipahimangnuan usab niini ang mga nuisance candidates nga dili na magfile ug COC kon nasayod na sila sa ilang kaugalingon nga wlaa silay kapasidad, dili kwalipikado, ug walay kasing-kasing alang sa serbisyo publiko.
Giklaro usab ni Atty Abbas nga luyo nga nagpadayon ang filing sa COC, business as usual matud pa ang Comelec, ug gaakomodar gihapon sila sa publiklo nga may nagkadaiyang transaksyon sa buhatan sama sa mga mukuha ug Comelec ID, mga mangutana kalabot sa ilang presinto o asa sila muboto, ug uban pang data.
