GENERAL SANTOS CITY – Nagsugod na ang bar examination karong adlawa sa tibook nasud kung asa Mindanao State University (MSU) GenSan ang usa sa mga venue.
Kini human nga nagdesisyon ang Korte Suprema nga dili na lamang sa kauluhan ipahigayon ang exam apan sa nagkadaiyang bahin sa nasud nga nakapasa sa mga rekositos.
Hugot nga seguridad ang gipatuman sulod sa MSU GenSan Fatima Campus.
Matud ni MSU Chancellor Usman Aragazi nga may koordinasyon na sila sa kapulisan sa syudad alang sa seguridad sa tanan nga mukuha ug bar exam lakip na ang mga personahe gikan sa Supreme Court.
Mapasigarbuhon si Chancellor Aragazi nga nag-inusara ang MSU Gensan Fatima campus nga bar testing center sa Region XII.
Kahinumduman nga nagpahigayon ug sunod sunod nga assesmant ug ocular inspections alang sa site preparations nga gipahigayon sa Office of the Bar Chairperson og laing mga opisyal sa Supreme Court.
Nasayran nga sayo pa sa buntag miadto na sa MSU ang mga magkuha og exam.
Karon pa lamang mitunol na sa ilang good wishes sa tanan nga bar takers aron mahimong tigbantay sa hustisya sa nasud.
