GENERAL SANTOS CITY – Lauman nga may mapasang-at na nga kaso unsa mang adlaw ning semanaha, may kalabutan sa pagpusil-patay sa usa ka pulis nga sakop sa Tupi Municipal Police Station nga si Spo4 Benedicto Gonzaga.
Kini human nga may ‘person of interest’ na nga gitan-aw ang kapulisan kalabot sa nasampit nga krimen miaging semana sa National Highway, Purok Santa Lucia, Polunoling, Tupi, South Cotabato.
Una niini, kahinumduman nga pauli na unta ang biktima sa ilang pinuy-anan gikan sa presinto, dihang kalit kining gitaparan sa riding in tandem nga suspek, dayon gipusil sa ulo sa makadaghang higayon hinungdan sa hinanaling kamatayon niini.
Sa pakighinabi sa Bombo Radyo kang P/Supt. Aldrin Gonzales, tigpamaba sa Police Regional Office 12, sa ulahing istorya kaniya ni P/C/Insp. Bernie Paldas, ang hepe sa Tupi Municipal Police Station nga may gitutukan na matud pa silang mga tawo nga adunay kalambigitan sa kamatayon ni SPO4 Gonzaga.
Hinuon, dili pa klaro sa kapulisan kung unsa ang motibo sa pagpamusil apan nagtuo si Gonzales nga pagpanimalos ang usa sa mga anggulo sa krimen.
