GENERAL SANTOS CITY – Dako ang ikatabang sa P800,000 nga premyo nga naangkon sa James L Chiongbian National Trade School aron mapalambo pa ang mga gamit sa maong tulunghaan sa pag-apil pa sa lain pang mga street dancing competitions dinhi sa Mindanao.
Kini human nasakmit sa maong tulunghaan ang ikaduha nga pwesto sa bag-uhay nahuman nga Indak- Indak sa Kadalanan sa Kadayawan festival sa dakbayan sa Davao.
Kini na ang ikaduha nga pagdaug sa maong tulunghaan human gideklara nga Grand Winner sa Kalilangan Festival sa General Santos kaniadtong Pebrero niining tuiga human maangkon ang P500,000 nga premyo.
Ang nahisgutang tulunghaan ang kanhi Kling National High School nga giila nga usa sa labing maayo nga tulunghaan sa rehiyon dose nga gipangalan kang kanhi Congressman James L. Chiongbian apuhan ni Sarangani Lone District Rep. Steve Chiongbian Solon.
