GENERAL SANTOS CITY – Tulo ang patay usa ang angol sa natigayong banggaanay sa sikad ug SUV, sa Leon Llido St. ning dakbayan.
Giila ang mga biktima nga silang Bob Cambungga, 22 anyos, John Rogel Ngilay, 18 anyos, taga-Zone 4-B Labangal-Saway, ug ang driver sa sikad nga wala pa mailhan ug gitawag pa lamang ug Mr. X.
Samtang ang nasamdan giilang si Jessie rey Yuson, 20 anyos, nga matud pa nalagpot sa kanal gumikan sa nasampit nga aksidente.
Sa inisyal nga impormasyon, natigayon ang aksidente ala-1:10 sa kaadlawon, kung asa gikan ang mga sakay sa sikad sa Xplore Bar ug pulos mga lango sa ilimnung makahubog.
Gikabutyag nga pasulod na unta sa Leon Llido St. ang sikad dihang gisugat sa SUV nga matud pa kusog ang dagan, hinungdan nga nagbanggaanay ang duha ka sakyanan.
Nasayran nga lango usab sa ilimnun ang driver sa SUV ug gisulayan pa untang musibat, apan sa tabang sa mga tawo sa palibot hinungdan nga napugngan ug karon anaa na sa kustodiya sa San Isidro Police Station, kung asa padayon nang giimbestigahan ang naasoy’ng aksidente.
