Gikonsidera ni US President Donald Trump ang pagpahamtang og 10% nga taripa sa mga imported nga produkto gikan sa China sugod sa Pebrero.
Gidepensahan ni Trump ang maong lakang pinaagi sa pag-akusar sa China nga giingong nagpadala sa fentanyl ngadto sa Estados Unidos, pinaagi sa Mexico ug Canada.
Ang Fentanyl usa ka ‘opioid’ nga nagpasamot sa global nga krisis sa ilegal nga droga.
Gisundan kini sa hulga ni Trump nga ipahamtang ang 25% nga buhis sa pag-import sa Mexico ug Canada, nga giakusahan sila nga gitugotan ang mga dili dokumentado nga migrante ug droga nga makasulod sa Amerika.
Kahinumdoman nga usa sa mga nag-unang saad ni Trump sa iyang kampanya mao ang pagpalapad sa mga taripa nga matod niya makatabang sa ekonomiya sa US.
Bisan pa, sumala sa mga analyst, mahimong mosangput kini sa mas taas nga presyo sa mga baligya alang sa mga Amerikano ug pas-anon sa mga kompanya nga naapektuhan sa pagbalos sa langyaw sa administrasyon.
