Nagpagaas ug bag-ong pasidaan sa Iran si US President Donald Trump samtang nagkataas ang tensyon sa pag-abli sa Strait of Hormuz.
Sa usa ka post sa Truth Social, si Trump miingon nga usa ka dakong katalagman ang mahimong mahitabo kung walay temporaryo nga kasabutan nga makab-ot.
Dugang niya nga naglaum siya nga ang posible nga pagbag-o sa pamunoan sa Iran makahatag ug positibo nga mga resulta.
Gihatagan usab ni Trump ang gobyerno sa Iran hangtod sa alas 8 sa gabii sa Eastern Time aron mouyon sa usa ka ceasefire, nga maglakip sa pag-abli sa Strait of Hormuz.
Niadtong Marso 21, 2026, si Trump sa sinugdanan naghulga nga moatake ug moguba sa mga planta sa kuryente sa Iran kung ang giingon nga agianan dili maablihan sulod sa 48 oras.
Bisan pa, paglabay sa duha ka adlaw, siya miingon nga ang mga panagsulti tali sa duha ka nasud “produktibo” ug nga temporaryo niyang gi-postpone ang giplano nga pag-atake sulod sa lima ka adlaw.
Sukad sa Marso 27, iyang gi-postpone pag-usab ang plano sulod sa 10 ka adlaw, giingong tungod sa hangyo sa gobyerno sa Iran, nga nagtakda og bag-ong deadline nga Abril 6, 2026.
Samtang nagkaduol ang petsa, si Trump nagpasidaan pag-usab niadtong Biyernes nga ang Iran adunay “48 ka oras” sa dili pa niya buhian ang “tanang impyerno.”
Sa laing post niadtong Domingo, iyang gisubli ang hulga ug gitawag ang Martes nga “Power Plant Day” ug “Bridge Day,” nga iyang giklaro sa ulahi nga mahitabo sa alas 8 sa gabii sa Eastern Time.
Ang Strait of Hormuz usa sa labing importante nga ruta sa lana sa kalibutan, busa ang bisan unsang pagsira o pagkabalda didto mahimong adunay dakong epekto sa ekonomiya ug seguridad sa kalibutan.
Ang Iran wala pa opisyal nga mitubag sa bag-ong ultimatum sa Amerika.
