GENSAN – Padayon ang gilusad nga imbestigasyon sa Police Station 2 (PS2) sa pagpamusil-patay sa usa ka tricycle driver nga nahitabo sulod mismo sa iyang panimalay sa Purok 5, Olarte Millionaires Village, Barangay Labangal niadtong Lunes sa udto.
Giila ang biktima nga si Amor Manonggol Galukan, 31 anyos, residente sa maong lugar. Base sa inisyal nga report, pasado alas 11:50 sa buntag dihang gipanuksan sa wala mailhing suspetsado ang balay sa biktima. Sulod didto, kalit kining gipusil si Galukan sa liog gamit ang wala pa mailhang armas nga hinungdan sa iyang pagkamatay diha-diha dayon.
Human sa insidente, dali nga misibat ang suspetsado sakay og motorsiklo paingon sa wala pa matino nga direksyon. Ang mga imbestigador sa PS2 nagpangita karon og mga posibleng CCTV footage sa dapit ug nagpangayo og testimonya gikan sa mga silingan aron masuta ang lihok sa suspetsado.
Matud ni Police Major Miguel Angelo Quidilla, hepe sa Police Station 2, ginasuta nila ang tanang anggulo lakip na ang personal nga relasyon, trabaho, ug posibleng negosyo sa biktima nga mahimong hinungdan sa pagpamusil. Giingon pa niya nga posibleng gitutukan gyud ang biktima tungod kay klaro nga gisulod kini sa balay ug gilayon gipusil.
Gidugang pa ni Quidilla nga padayon silang nag-coordinate sa mga barangay officials ug uban pang mga law enforcement agencies aron makuha ang dugang ebidensya ug makilala ang suspetsado. Gihangyo usab niya ang mga residente nga adunay kasayuran sa kaso nga motabang sa kapulisan aron madakpan ang responsable ug mahatagan hustisya ang pamilya sa biktima.
