GENSAN- Mikanta ang usa sa mga gialegaran nga suspek sa pagpangdunggab patay sa 21-anyos nga graduating college student sa MSU Gensan nga si Miyuki Kim, sulod mismo sa iyang lawak kaniadtong Disyembre 8 sa Prk. DBP, Barangay Apopong ning dakbayan.
Giila ang maong suspek nga si alyas Aaron, 21-anyos ug residente sa Purok San Lorenzo, Apopong.
Sa pakighinabi kaniya sa Bombo Radyo, gibutyag niini nga gihimo syang lookout samtang ang duha pa niya nga kauban, nga nailhan nga alyas Inday ug alyas Oblong ang misulod sa panimalay sa biktima aron mangita sa kuwarta.
Dugang pa niya, si alyas Oblong ang midunggab sa biktima human silang masakpan ug gisultihan sa biktima nga iyang isumbong ang mga nasampit sa inahan niya.
Human sa insidente, gipalong ni alyas Inday ang plangka sa kuryente, ug dali silang misibat samtang nagkadugo si alyas Oblong.
Nadakpan si alyas Aaron sa miaging adlaw atol sa usa ka buy-bust operation sa Regional Police Drug Enforcement Unit I2 sa Barangay Calumpang.
Samtang si alyas Oblong ug alyas Inday ang anaa na usab sa kustodiya sa otoridad.
