GENERAL SANTOS CITY – Gipailawom una sa quarantine ang nasikop nga suspek sa pagpamanhig sa mga sakop sa PNP Maritime 12 sa miaging tuig sa Purok Kulasi, Baràngay Labangal ning siyudad sa Heneral Santos.
Giila ang nadakpan si Assare Nuh, hamtong pangidaron nga lumulupyo sa Purok Kulasi,Labangal ning siyudad.
Gibutyag sa Bombo Radyo GenSan ni Police Lt Col. Harry Domingo, Regional Chief sa Philippine National Police Maritime Unit 12 , nga nadakpan ang nasampit sa Barangay Pura, Datu Blah Sinsuat, Maguindanao.
Gibutyag nga una nasikop si Nuh ang gapalusot ug illegal nga sigarilyo.
Gitunol sa Maritime Police ang warrant of arrest sa suspect nga ilang dala nga nag-ilis pa og pangalan.
Ang nasampit ang gaatubang og kasong complex crime of direct assault with frustrated murder, nga may pyansa nga P200,000.
Samtang walay pyansa ang kasong complex crime of direct assault with murder.
Kahinumduman nga ang suspect nga naaresto nga si Assare Nuh alyas Hadjirul Pandaug Asah , maoy nag unang akusado sa pagpamanhig sa nagpatrolyang mga pulis sa kadagatan niadtong Nobyembre 28, 2019 sa Purok Kulasi , Baràngay Labangal ning siyudad.
Gumikan niini nagresulta kini sa pagkalunod ug pagkawala ni Police Master Sergeant Fidelberto Bernardino Jr. , ug pagkamatay ni Police Master Sergeant Rodrigo Salmon Jr. samtang naangol silang Police Master Sergeant Roger Agudania ug Police Master Sergeant Edwin Tubig Jr.
