Daghang mga tawo ang gituohang namatay ug kapin sa 100 ang nasamdan human miulbo ang sunog sa usa ka bar sa ski resort sa Crans-Montana, Swiss Alps, Switzerland, atol sa selebrasyon sa Bag-ong Tuig, niadtong Enero 1, 2026.
Sumala sa Cantonal Police sa Valais, usa ka kusog nga pagbuto ang nahitabo tungod sa sunog, apan walay timailhan sa terorismo sa lugar. Daghan sa mga nasamdan ang nakaangkon og grabe nga paso.
Tungod niini, napugos ang mga awtoridad sa pagpadala og 10 ka helikopter, 40 ka ambulansya, ug 150 ka rescue personnel aron moresponde sa makalilisang nga insidente.
Sumala sa report, wala pa matino sa mga awtoridad ang hinungdan sa sunog ug giingon nga ang usa ka “explosive device” dili ang hinungdan sa kusog nga pagbuto. Dugang pa, wala pa gikumpirma sa mga awtoridad ang impormasyon bahin sa nasyonalidad ug identidad sa mga biktima. Nahibal-an nga ang bar nailhan nga sikat sa mga turista.
Gikordon na karon sa pulisya ang lugar, ug nagbutang usab og no-fly zone. Gitabangan sa mga awtoridad ang mga pamilya sa pag-ila ug pag-uli sa mga patayng lawas sa mga biktima isip pagtahod kanila.
