GENERAL SANTOS CITY – Karong adlawa na matigayon ang Sugbahan sa Dalan, nga usa sa highlights sa kasaulugan sa 20th Tuna Festival, nga ipahigayon sa Pioneer Avenue dinhi sa dakbayan.
Sa pakighinabi sa Bombo Ra dyo, gibutyag ni Checklet Rillo, usa sa organizers, nga magsugod ang event alas 5:00 sa hapon kung asa katunga sa Pioneer Avenue ang gamiton.
Sama sa miaging mga tuig, aduna gihapoy entertainers sama sa live bands samtang gasugba ang mga partisipante sa mga parilla nga giandam nang daan sa lugar. Gibutyag ni Rillo nga adunay kompanya nga maghatag ug dakong isda alang sa lechon tuna.
Samtang ang partisipante ang hatagan ug tig-lima ka kilo nga isda gawas pa sa ilang kaugalingong isda nga dal-on sa event.
Giklaro ni Rillo nga dili able sa publiko ang venue gawas lang sa mga giimbitahan nga mga kumpanya, organisasyon ug grupon nga mga partisipante, apan gipasalig nga adunay sinugbang isda nga libreng ipanghatag sa publiko.
Samtang, adlaw’ng Miyerkules na, Setyembre 5, matigayon ang labing giatangan nga Bombo Bancarera: Tuna Festival Edition Mindanao Circuit Championship Leg.
Usa kini sa tinuig nga aktibidad nga ginapahigayon sa Bombo Radyo, ug usa sa highlights sa Tuna Festival.
Ipahigayon kini sa Queen Tuna Park, kung asa giimbitahan ang tanang nakigduyog sa 20th Tuna Festival nga saksihan ang pinasahi ug kulbahinam nga lumba sa mga labing maayo ug hanas nga banca riders sa tibuok Mindanao, nga midaog sa unang upat ka hugna sa Bombo Bancarera 2018 Mindanao circuit leg, nga una nang natigayon sa Sarangani, Butuan, Davao, ug Cagayan de Oro.
Dagkong premyo ang nagpaabot sa mga mudaog.
Ang magkampeon makadaog ug P100,000; ang 1st runner-up makadaog ug P50,000; ang 2nd runner-up makadaog ug P20,000; samtang ang mga non-winning participants makadawat gihapon ug tig-P1,000 nga consolation prize.
