GENERAL SANTOS CITY – Migawas na ang resulta sa gihimong water analysis nga gihimo sa taga-EMB, human mipula ang tubig-dagat sa Prk Tinago ning siyudad kaniadtong weekend.
Base sa report, non-toxic kon dili makahilo ang substance nga misagol ug nagpapula sa mukabat sa 1.2 ektarya sa nasampit nga bahin sa dagat, nga gikan matud pa sa gigamit sa usa ka tulunghaan nga nagpahigayon ug color fun run.
Gumikan niini, nag-atubang matud pa ug reklamong Illegal Disposal of Untreated Waste Water, nga may P2,000 nga multa alang sa first offense.
Apan gibutyag sa organizer sa nahisgutang color fun run nga kumpleto sila sa permit ug wala na-orient sa lokal nga panggamhanan nga posibleng musulod ang gigamit nga kulay sa drainage ug naadto sa main sewer sa siyudad hinungdan nga migawas didto sa Prk Tinago.
Hinuon, andam matud pang mag-community service ang mga organizers sa nahisgutang aktibidad. Tungod sa nahitabo, nasuta usab nga walay centralized waste water treatment ang siyudad, nga usa pa pagsupak sa balaod, partikular sa Clean Water Act.
Sa pakighinabi sa Bombo Radyo, gibutyag ni Kapitan Rock Garay sa Brgy Dadiangas South, nga human sa unang hugna sa conference, subli silang magtakda ug laing panagpulong kalabot sa nahitabo, ug aron maresolba na usab ang problema sa drainage sa siyudad.
Samtang, matud sa Waste Management Office, luwas gihapong maligo sa baybayon sa Queen Tuna Park ug Prk Tinago.
