Miapil na usab ang China sa nanawagan sa pagpahunong sa panagbangi tali sa Israel ug Iran aron mapugngan ang pagkaylap sa gubat samtang nagpadayon kini sa ika-onse ka adlaw.
Matod ni Foreign Ministry Spokesman Guo Jiakun, gihangyo sa China ang mga partido nga nalambigit sa maong panagbangi nga pugngan ang pagkagrabe sa kahimtang, determinado nga malikayan ang pagkaylap sa gubat, ug mobalik sa usa ka politikal nga resolusyon.
Gipahayag usab sa China nga ang internasyonal nga komunidad kinahanglan molihok aron mapugngan ang gubat tali sa sa duha ka nasud nga makaapekto pa gyud sa ekonomiya sa daghang nasud.
Gipasiugda pa sa China nga ang Persian Gulf ug ang mga kadagatan nga naglibot niini importante nga agianan sa internasyonal nga kalakalan.
Matod pa sa Chinese Foreign Ministry, ang pagmintinar sa seguridad ug kalig-on sa rehiyon usa ka ‘common interest’ sa tibuok internasyonal nga komunidad.
Gibuhat sa Chinese foreign minister ang maong pamahayag pagkahuman sa panawagan ni US Secretary of State Marco Rubio sa China nga motabang sa pagpugong sa Iran sa pagpanghipos sa Strait of Hormuz — usa ka hinungdanong ruta sa kalakalan — human sa mga strike sa US batok sa tulo ka nuclear sites sa Iran.
