GENSAN- Gipasabot ni Geronimo Desesto, General Manager sa SOCOTECO 2 nga walay problema sa supply sa kuryente sa ilang franchise area, apan problemado gihapon ang power quality, ilabi na sa pipila ka lugar nga nakasinati og low voltage ug frequent power interruptions.
Sumala sa kooperatiba, usa sa mga hinungdan sa kalit-kalit nga power interruptions mao ang kawalay katakos nga ma-isolate dayon ang apektadong area.
Sa kasamtangan, kung adunay kalit nga pagkawala sa kuryente sa usa ka linya o bahin sa grid, ang tibuok feeder ang damay, hinungdan nga mas daghan ang maapektuhan.
Apan, aduna na silay bag-ong naabot nga mga “reclosers”, kini mga automated switching devices nga mahimong gamiton aron ma-isolate lang ang area nga adunay problema, ug dili na kinahanglan madamay ang tibuok linya.
Kini gilauman nga maka-minos sa epekto sa mga wala agilauman nga brownout ug makapalambo sa serbisyo sa kuryente.
Gilauman sa SOCOTECO 2 nga pinaagi sa paggamit sa mga ‘recloser’, mas mapadali ang pag-responde sa mga problema, mas maminusan ang ‘downtime’, ug mas mahatagan ug kalidad nga serbisyo ang ilang mga member-consumer.
