Giila sa Guinness World Records ang usa ka bombero gikan sa Florida, USA, isip kinamub-an nga babayeng bombero sa tibuok kalibutan!
Nakuha ni Autumn Kelso ang opisyal nga titulo nga “shortest firefighter (female)” human nasuta nga ang iyang gitas-on anaa sa 4 ka tiil ug 10 ka pulgada.
Gihatag kaniya ang maong titulo niadtong Enero 18, human namatikdan sa iyang mga kauban sa estasyon sa bombero nga mahimo siyang kwalipikado alang sa rekord sa Guinness.
Lima na ka tuig nga nagserbisyo isip bombero si Kelso sa St. Pete Beach, Florida. Lakip sa iyang mga tahas ang pagtubag sa mga alarma sa sunog ug uban pang mga emerhensya, pagmaneho sa trak sa bombero, paggamit sa mga hose nga adunay kusog nga presyur sa tubig, ug pagsulod sa mga bilding nga nasunog.
Dili orihinal nga plano ang pagkahimong bombero. Human sa 20 ka tuig nga pagtrabaho sa korporasyon, nakaamgo siya nga dili para kaniya ang trabaho sa opisina. Gidasig siya sa iyang mga higala nga nagtrabaho sa serbisyo sa bombero nga sulayan kini nga propesyon.
Matod ni Kelso, usa sa mga butang nga labi niyang gihigugma bahin sa trabaho mao ang oportunidad nga makatabang sa mga tawo nga nag-atubang og kritikal nga mga emerhensya.
