Nagpaklaro si Orly Sabelita, General Manager sa Metro Gensan Transport Cooperative, nga ang ipahigayon nilang transport holiday karong umaabot nga adlawng Huwebes, Marso 26, usa lamang ka “silent protest.”
Matud ni Sabelita, kini nga lakang kabahin sa ilang pakigduyog sa nationwide transport holiday nga gihimo usab sa ubang transport groups isip pagprotesta sa padayong pagsaka sa presyo sa lana.
Gipasabot niya nga isip simbolo sa ilang protesta, dili mamasada ang ilang mga miyembro sa maong adlaw. Tumong niini nga ipakita sa gobyerno ang kalisod nga nasinati sa mga jeepney driver ug operator nga naglisod na og ginansya tungod sa mahal nga gasolina.
Dugang pa niya, daghan sa ilang mga miyembro ang padayon nga nag-atubang sa pagkalugi tungod sa gamay nga kita kumpara sa ilang adlaw-adlaw nga gastohon, lakip na ang krudo, maintenance, ug uban pang bayronon.
Bisan pa man, gihangyo sa kooperatiba ang publiko nga mag-andam sa ilang biyahe karong Huwebes tungod sa posibleng kakulang sa pampublikong sakyanan.
Samtang nagpadayon ang pagsaka sa presyo sa lana, padayon usab ang panawagan sa transport sector nga hatagan og dugang suporta ug solusyon sa gobyerno aron matabangan ang ilang kahimtang.
