Giaprobahan sa Senate panel kagahapong adlawa ang mga sugyot nga nagtumong sa paglangan sa Barangay ug Sangguniang Kabataan Elections o BSKE sa 2026 ug paghimo og lima ka tuig nga termino alang sa mga barangay ug SK officials.
Matod ni Senator Francis “Chiz” Escudero, tumong sa iyang sugyot nga ayuhon na ang termino sa mga barangay ug SK officials aron dili na kini balik-balik nga usbon o gamiton isip rason sa pagpalangan sa eleksyon.
Ubos sa Senate Bill No. 2387, gisugyot ni Escudero nga amyendahan ang Republic Act No. 12232 ug himoon nga lima ka tuig gikan sa kasamtangang upat ka tuig ang termino sa mga barangay ug SK officials.
Samtang, si Senator Imee Marcos ang nagpasaka sa Senate Bill No. 2067, nga nagtumong nga ibalhin ang BSKE gikan sa Nobyembre 2026 ngadto sa Oktubre 2027.
Gikatakda unta ang BSKE sa Nobyembre 2, 2026.
Nanawagan usab si Comelec Chairperson George Garcia nga adunay klarong desisyon sa labing dali nga panahon kung ipadayon ba o dili ang BSKE.
Matod ni Garcia, kinahanglan mahibal-an ang desisyon sa dili pa matapos ang Septyembre, tungod kay gikatakda ang filing of candidacies gikan Septyembre 28 hangtod Oktubre 5.
Giingon niya nga mas maayong mahimong klaro na ang isyu pag-abot sa ikaduhang semana sa Septyembre aron makapangandam ang mga kandidato ug mga field personnel sa Comelec.
