Gi-aprobahan sa Senado sa ikatulong pagbasa, pinaagi sa boto nga 13-5-0, ang Senate Bill No. 2387 nga magtakda og lima ka tuig nga termino sa mga opisyal sa Barangay ug Sangguniang Kabataan o SK.
Ang panukala nga gisumite ni Senator Francis “Chiz” Escudero maghimo og bag-ong electoral cycle ug magpalangan sa Barangay ug Sangguniang Kabataan Elections o BSKE nga gitakdang ipahigayon unta sa Nobyembre 2026 ngadto sa Nobyembre 2028.
Matud ni Escudero, tumong sa panukala ang paghimo og mas klaro ug hapsay nga sistema sa lokal nga pangdumala ug aron malikayan ang balik-balik nga pagpalangan sa barangay ug SK elections kon magsabay kini sa national elections.
Apan gisupak kini sa pipila ka senador, lakip sila Senator Tito Sotto ug Joel Villanueva, nga miingon nga ang dugang nga pagpalangan sa BSKE mahimong makalapas sa probisyon sa Saligang Batas.
Gipunting usab nila ang hapit P8 bilyon nga gasto sa Commission on Elections o Comelec alang sa pagpangandam sa eleksyon karong tuiga.
Samtang, nakapasar na usab sa ikatulong pagbasa sa House of Representatives ang counterpart measure nga House Bill No. 10971.
Sunod na kining hisgutan sa bicameral conference committee ug kung maaprobahan, isumite kini sa Malacañang alang sa pirma ni Pangulong Ferdinand Marcos Jr.
