Gikuwestiyon ni Senator-judge Raffy Tulfo ang pagpresentar sa House prosecution panel sa saksi gikan sa Philippine National Police o PNP kalabot sa mga rehistradong armas ni Vice President Sara Duterte ug sa iyang bana nga si Atty. Manases “Mans” Carpio.
Gitawag ni Tulfo nga “waste of time” o pag-usik sa oras ang pagpresentar sa maong testimonya atol sa pagpadayon sa impeachment trial.
Nalambigit sa testimonya ni Police Major Joericson Sangalang, Records Division Chief sa PNP Firearms and Explosives Office, ang 51 ka armas nga nakarehistro sa magtiayon nga adunay kapin 7.2 milyon pesos nga market value.
Matud ni Tulfo, personal property ang mga armas nga mahimong ideklara sa Statement of Assets, Liabilities, and Net Worth o SALN, ug daghan usab nga mga senador ug opisyal sa gobyerno ang adunay kaugalingong armas.
Tungod niini, gikuwestiyon niya ang kalabutan sa maong testimonya sa alegasyon sa unexplained wealth, ug miingon nga mas angay gamiton sa Senado ang ilang oras sa mga buluhaton sa lehislatura imbis sa mga saksi nga iyang giisip nga walay direktang kalabutan sa maong alegasyon.
