Gibutyag ni Senador Sonny Angara nga abli siya nga dawaton nga mahimong kalihim sa Department of Education (DepEd) kung tanyagan ni Pangulong Ferdinand “Bongbong” Marcos Jr.
Sa ambush interview sa selebrasyon sa Philippine-Spanish Friendship Day sa Baler, Aurora, gibutyag sa senador nga lisod balibaran kung ang Presidente ang magtanyag sa posisyon.
Apan sa karon, gibutyag ni Angara nga wala siyay nadawat nga tanyag gikan sa Malacañang.
Lakip ang pangalan ni Angara sa mga milutaw nga posibleng gipilian nga muhulip sa gibakanteng posisyon ni Vice President Sara Duterte.
Ulahing termino na si Angara isip senador sa June 2025.
Suportado usab sa pipila ka senador si Angara nga mahimong DepEd Secretary, lakip si Senate President Francis “Chiz” Escudero.
Sumala kang Angara, usa sa mga commissioner sa Second Congressional Commission on Education ug nahimong chairman sa House Committee on Higher and Technical Education niadtong kongresista pa, lakip sa mga angayang tutukan sa musunod nga kalihim sa DepEd ang patas-an ang kalidad sa edukasyon, ug problema gihapon sa kakulangon sa mga classrooms ug libro.
