GENSAN- Gilaumang mas modako pa ang oportunidad alang sa sektor sa pagpanagat sa nasod, ilabi na sa dakbayan sa General Santos, human gibutyag ni Gensan Lone District Rep. Shirlyn Bañas ang nagpadayong panag-istorya tali sa Pilipinas ug sa nasod sa Palau.
Sumala ni Rep. Bañas, usa sa iyang gitutukan karon mao ang pagpalambo sa fisheries sector.
Sa iyang pakigtagbo bag-ohay lang uban sa Speaker sa Palau, nahisgotan ang posibilidad sa pag-abli sa dugang nga mga fishing grounds alang sa mga mangingisdang Pilipino sa maong dapit.
Gawas sa kaayohan sa mga mananagat, dako usab kini og epekto sa ekonomiya sa Gensan ug sa tibuok Pilipinas tungod sa madugang nga suplay sa isda.
Sa pagkakaron, nakig-alayon na ang buhatan sa kongresista ngadto sa Bureau of Fisheries and Aquatic Resources (BFAR).
Nagpahigayon na og mga Technical Working Group (TWG) meetings aron ma-fine-tune o maplantsa ang mga teknikal nga detalye sa maong kasabutan aron masiguro nga hapsay ang implementasyon niini.
