GENERAL SANTOS CITY – Naka-red alert status karon ang kapulisan sa tibuok Rehiyon 12. Kini human sa natigayong pagbusikad sa car bomb sa Lamitan City sa Basilan nga gikamatay sa 10 ka tawo.
Matud ni Police Supt. Aldrin Gonzales, tigpamaba sa PRO-12, nagdugang na ug mas daghan ug mas hugot nga checkpoint ang Police Regional Office 12 sa nagkadaiya nilang areas of responsibility.
Ug gani, gisugdan na kini sa mga kadalanan pasulod ug pagawas sa mga munisipyo ug siyudad sa South Cotabato ug Sarangani.
Nasayran nga may bahad usab nga pagpamomba sa pipila ka mga siyudad sa Mindanao, kung asa dili buot magkumpiyansa ang kapulisan ug kasundaluhan, luyo nga dili na bag-o kanila ang mga susamang intelligence report.
Giklaro usab sa kapulisan nga wala bisan kanus-a gipa-ubos ang alerto sa Region 12 ug mga kasikbit nga lugar, hilabi pa nga epektibo gihapon ang martial law.
Dungan niini, nanawagan usab ug kooperasyon ang mga otoridad gikan sa katawhan, nga gilayong i-report kon ugaling may mamatikdan nga mga kadudahang butang o tawo sa palibot, nga dakong tabang matud pa sa ilang intelligence, aron mapabilin ang kahapsay ug kalinaw sa palibot.
