GENERAL SANTOS CITY – Hugot nga gitutukan sa mga opisyal sa Brgy Bula ang gilaumang sitwasyon sa trapiko ug sa seguridad alang sa mismong adlaw sa Sto. Niño de Bula 2017, sa Enero 15, adlaw’ng Dominggo.
Kini hilabi na nga sama sa naandan, lauman gayud nga muhuot ang dagan sa trapiko sa sentrong bahin sa Bula, ug may mga ruta kon asa lamang tugutan nga muagi ang mga sakyanan.
Matud ni Kapitan Remus Declaro, walay mamahimong kabag-uhan sa ruta nga agianan sa mga sakyanan, sama sa gipatuman sa mga nakalabay’ng tuig, samtang naka-full-force usab ang mga barangay tanod aron mapaniguro ang kaluwasan ug seguridad sa tanan nga makigduyog sa maong kapiyestahan.
Samtang, kalabot sa ipahigayon nga fluvial parade, hugot na ang pagpangandam sa mga organizers, kung asa matud ni Roel “Tata” Granfon sa Roel Fishing, walay mamahimong kausaban sa ruta sa amphibian nga pagasakyan sa Sr. Sto Niño.
Human sa misa, gikan sa Bula Parish Church, mularga ang amphibian sakay ang Sr. Sto Niño sa Prk 5 ug didto sugaton ug alirungan sa lawod sa mga panagatan gikan sa nagkadaiyang mga fishing company, dayon mutuyok sa bahin sa Brgy Tambler dayon muagi sa Queen Tuna Park, diretso sa Sto Niño, Bula.
Samtang, gikatakda usab hisgutan ang kalabot sa paglimita sa mga tawo nga musakay sa amphibian aron mapaniguro ang kaluwasan niini, ingon man sa mga musakay.
