GENERAL SANTOS CITY -Gipaniguro sa General Santos City Police Office ang pagbantay sa seguridad sa tanan atul sa usa ka semana nga kasaulogan sa Tuna Festival luyo nga nag-abli na ang flea market, food court og karnival sa Oval Plaza niadtong Lunes.
Matud pa ni P/Sr/Insp. Davis Dulawan sa GSCPO, mukabat sa 1,802 police personnel ang magbantay sa seguridad sa maong kapiyestahan aron masiguro ang kaluwasan sa tanang mudagsa sa mga aktibidad.
Lakip sa magpatuman sa security measures ang GSCPO, Maritime, Coast Guard, AFP og uban pang support unit gikan sa PRO 12.
Subling gipahinumdum sa kapulisan nga dili gihapon tugtan ang pagpasulod sa back pack, mga armas ug uban nga mahait nga butang sulod sa Oval Plaza kung asa nahimutang ang mga kalingawan.
Gani nagpatuman og hugot nga Intelliginece monitoring aron dili malutsan ang selebrasyon og dautang elemento nga gamiton ang selebrasyon aron muhimo og krimen.
Kahibaluan, sa Sept 1 ang Grand opening sa TunaFest og sa Sept 5 ang culmination activity.
