Nagpabilin gihapon nga prayoridad sa South Cotabato Police Provincial Office (SCPPO) ang pagpatuman sa 3-to-5 minute response time sa matag emerhensiya ug operasyon nga ginadumala sa kapulisan sa probinsya.
Sa pamahayag ni Police Colonel Samuel Cadungon, provincial director sa SCPPO, iyang giingon nga dili lamang limitado sa mga tawag sa emerhensiya ang ilang paspas nga aksyon, kundili lakip na kini sa tanan nilang operasyon aron masiguro ang kaluwasan ug seguridad sa publiko.
Gipasabot usab ni Cadungon nga gisagop gihapon sa kapulisan ang programa alang sa kahimsog sa ilang mga personahe, sama sa regular nga pag-monitor sa body mass index (BMI) aron mapadayon ang kondisyon ug kapasidad sa mga pulis sa pagserbisyo sa katawhan.
Bisan pa man nga bag-o ang liderato sa Philippine National Police sa nasud, gipasabot ni Cadungon nga magpadayon gihapon sila sa istriktong pagpatuman sa direktiba nga paspasan ang pagresponde sa tanang matang sa emergency assistance.
Matud pa niya, dili mamahimong babag ang pag-ilis sa liderato sa PNP tungod kay mandato gyud nila nga ang katawhan protektahan ug alagaran sa labing dali nga paagi.
