GENERAL SANTOS CITY – Lauman nga mas mamahimong exciting ang matigayon nga Dugong Bombo 2018 dinhi sa dakbayan ugmang adlawa, Nobyembre 17, sa Robinsons Place.
Kini gumikan gawas libreng snacks, Red Cross card ug Dugong Bombo Tshirt nga ihatag sa tanan nga mamahimong successful blood donors, may tsansa usab silang makadaog sa ipahigayon nga raffle draw.
Sa maong adlaw, samtang padayon ang blood donation, matag oras mubunot ug usa ka palaron nga blood donor alang sa mga nindot nga premyo nga appliances ug uban pang mga butang nga magamit sa panimalay. Gawas niini, may mga performers usab nga mulingaw sa tanan.
Hinungdan nga makonsiderang usa ka family affair ang matigayon nga Dugong Bombo 2018, kung asa pwedeng dal-on ang tibuok pamilya, ug pwedeng magdonate ang tanang miyembro sa pamilya nga 17-anyos pataas, basta mamahimong kwalipikado.
Kahibaluan nga una makadonar ug dugo, mupailawom una sa libreng check-up ang tanang aspiring blood donors.
Ang Dugong Bombo usa sa mga dagkong proyekto sa Bombo Radyo Philippines isip kabahin sa corporate social responsibility sa network, nga dungan nga ipahigayon sa 24 ka nag-unang siyudad sa tibuok nasud nga may Bombo Radyo ug Star FM stations, sa tumong nga makatigom ug dakong suplay sa dugo aron makatabang sa mga isig-kaingon nga nagkinahanglan aron masumpayan ang ilang kinabuhi.
