GENERAL SANTOS CITY – Mukabat sa 150,000 ang nakigduyog sa bag-uhay lamang nahuman nga Sarangani Bay Festival kon Sarbay Fest 2019 sa Sarangani Province.
Mapasigarbuhon nga gibutyag sa organizers nga nagmalampuson na usab ning tuiga ang gikonsiderang labing dako nga beach festival sa tibuok nasud.
Matud sa first lady sa probinsya nga si Ms. Michelle Solon, asawa ni Gov. Steve Chongbian-Solon ug maoy chairwoman sa Regional Tourism Council 12, base sa iyang post sa social media, nga nahimong posible ang sadya ug limpyo nga pagsaulog sa Sarbay Fest.
Nasayran nga nagtuboy ang organizers ug 150 ka cleaners nga maoy nagmintina sa kalimpyo sa palibot.
Nagpasa usab sila ug ordinansa ang probinsya kung asa gibawal ang single use plastics.
Kahibaluan nga human mismo sa naasoy’ng beach festival, naglusad ang lokal nga panggamhanan ug cleanup drive sa beach grounds aron masiguro nga walay mabilin nga basura ug mamintina ang kahinlo sa Sarangani Bay.
Ug human sa gihimong cleanup drive, nakatigom matud pa ug kinatibuk-ang 2.5 tons sa basura.
