GENERAL SANTOS CITY – Gikumpirma ni Police Supt. Teody Condesa, tigpamaba sa Sarangani Police Provincial Office nga nagsugod na sa pag-imbestiga ang SPPO may kalabotan sa ‘KAPA’ kon Kabus Padatuon nga gitukod sa nagpangalang Joel Apolinario.
Gibutyag ni Condesa, adunay mando si Police Senior Supt. Arpha Abul Kyr Macalangcom Jr, Provincial Director sa SPPO nga mag-atubang og sanction o silot kung mag-apil apil sa KAPA.
Sa ipahayag ni Condesa, ang maong mando nga mag-imbestiga may kalabotan sa KAPA ang gikan mismo sa Camp Crame.
Mag-atubang og adminsitrative case ang kinsa mang pulis nga mapamatud-ang nalambigit sa KAPA. Gikadugang pa ni Condesa, tanang chief of police sa Sarangani ang nakabalo na og unsa ang sanction nga atubangon kon mag-apil-apil niini.
Sa pakighinabi sa Bombo Radyo GenSan kay Condesa, nangutana pa ang opisyal kung unsa nga KAPA ang buot ipasabot sa sibyahanan.
Hinuon, human nga gipasabot sa nasampit ang kabahin niini gikanayon nga gi-imbestigahan pa sa SPPO kon unsa may bayolasyon nga angayang ipahamtang sa KAPA.
Kahibaluan, ang mga miyembro sa KAPA ang nag-invest og salapi human naagni sa pasalig nga may mabalik nga 30% gikan sa ilang gi-invest.
Apan giklaro ni Jazer Radasa, Admin Officer sa Security Exchange Commission- Cagayan de Oro nga ilegal ang kalihukan sa KAPA.
