GENERAL SANTOS CITY – Anaa na sa 90 porsiento ang preparasyon sa Sarangani Province alang sa matigayon nga Munato Festival 2019 nga magsugod sa Nobyembre 27 hangtud Nobyembre 30, ning tuiga.
Sa pakighinabi sa Bombo Radyo GenSan kang Tourism Officer April Marjorie “Langlang” Purisima, sa Sarangani Province atol programang Good Morning Philippines,iyang gibutyag nga han-ay na ang mga aktibidad lakip na ang security.
Sa Nobyembre 27 sa pagsugod sa Munato Festival masaksihan ang dula sa Maharlika Pilipinas Basketball League nga gilauman ang presenya ni Sen Manny Pacquiao nga maoy founder sa liga.
Sa Nobyembre 28 alas 8:00 sa buntag matigayon ang parada lakip na ang foundation day opening og employees day. May matigayon nga cheering competition, opening sa Municipal Village nga ipakita kung unsa ang produkto sa pito ka munisipyo sa Sarangani.
Sa maong adlaw gihapon ang Transport Summit, MunaTo Photo Contest og uban pa kung asa sa gabii matigayon ang Munato Youth Festival.
Sa Nobyembre 28 masaksihan ang MunaTO IP Day, Tribal Sports, Philippine Eagle Film Viewing og sa gabii ang Pearl of Sarangani.
Nasayran nga pito ang kandidata nga mag-indig sa Pearl of Sarangani.
Sa Nobyembre 30 ipahigayon ang Tunog Katutubo, Tunog Mindanao, Battle of the Bands, concert og fireworks display.
Ang Munato ang usa Blaan word nga ang Muna nagpasabot nga una og ang To ang tawo. Ang 17th Munato Festival ang alayon sa ika 27 ka tuig nga founding anniversary sa Sarangani.
