Gibalibaran sa Sandiganbayan Second Division ang mosyon sa prosekusyon nga tangtangon si kanhi Department of Public Works and Highways Secretary Manuel Bonoan isip kaubang akusado sa kasong graft nga giatubang ni Senador Jinggoy Estrada kalabot sa giingong anomalya sa mga flood control projects.
Matud sa korte, dili na mahimong usbon ang impormasyon sa kaso tungod kay na-arraign na si Estrada niadtong Hunyo 4.
Ang pagtangtang kang Bonoan, matud sa korte, mag-usab sa teorya sa kaso gikan sa “conspiracy” ngadto sa “individual liability,” nga mahimong makaapekto sa depensa sa senador.
Gitinguha sa prosekusyon nga tangtangon si Bonoan aron mahimo siyang state witness sa mga kasong may kalabotan sa flood control projects, lakip na ang master case batok kang kanhi House Speaker Martin Romualdez.
Apan, giinsistir sa Sandiganbayan nga dili tugotan ang maong kausaban niining bahina sa paghusay.
Matud ni Presiding Justice Geraldine Econg, ang gisugyot nga giusab nga impormasyon sa kaso nagtangtang sa bugtong kaubang akusado ug giingong kauban sa panagkunsabo ni Estrada, nga maoy makausab sa teorya sa kriminal nga responsibilidad gikan sa conspiracy ngadto sa indibidwal nga responsibilidad ni Estrada.
Gipasabot usab sa korte nga mahimo gihapon nga i-discharge si Bonoan isip state witness sa hustong yugto sa paghusay.
Sa pagkakaron, magpabilin siyang kaubang akusado sa kaso batok kang Estrada, nga padayon nga ginabantayan tungod sa giingong flood control kickback scheme.
