Gibuhian na sa Sacramento Kings ang All-Star guard nga si DeMar DeRozan.
Bisan pa og wala pay klarong koponan nga iyang balhinan, miuyon na ang Sacramento Kings sa iyang pagbiya ug mahimong free agent si DeRozan karong 2026.
Duha ka season ang gigahin ni DeRozan uban sa Sacramento ug nakahimo siya og average nga 18.4 points kada duwa, apil ang 2.9 ka rebounds, 4.1 ka assists, ug impresibong 1 ka steal matag duwa.
Sa miaging duha ka season, napadayon usab niya ang 49.7% nga overall shooting ug 32% nga 3-point shooting percentage.
Si DeRozan usa sa mga kasaligan nga magdudula ilabi na sa mga higayon nga hapit na matapos ang duwa ug sa iyang midrange shots. Sa clutch situations, nahimutang siya sa ika-19 nga pwesto sa NBA sa pinakadaghan nga clutch points nga iyang nahimo.
Bisan pa niini, dili maayo ang pagtapos sa 2025-2026 season sa Sacramento human sila makarekord og 16 ka sunod-sunod nga kapildihan.
Narekord sa team ang 60 ka kapildihan sa maong season, nga mao ang ikaduhang pinakadaghan nga kapildihan sa kasaysayan sa koponan. Ang unang rekord mao ang 65 ka kapildihan nga nahitabo niadtong 2008-2009 NBA season.
