GENERAL SANTOS CITY – Midepensa ang Police Regional Office 12 ug Regional Police Drug Enforcement Unit o RPDEU-12 sa nahitabong sa gipahighayong sunud-sunod nga search operation kagahapong adlawa kung asa usa sa mga target ang napatay, human matud pa misukol.
Sa gipahigayong press conference kagahapong adlawa, gibutyag PRO-12 Director Gen. Marcelo Morales, 14 ka search warrants ang giimplementa sa RPDEU-12, kung asa siyam ka tawo ang target, sa tulo ka mga barangay sa siyudad, may kalabutan sa pagsupak sa RA 9165 kon Comprehensive Dangerous Drugs Act of 2002, ug RA 10591 kon Comprehensive Law on Firearms and Ammunition.
Napatay matud pa ang usa sa targets nga si Mamundas Climaco, 35-anyos, taga-national highway, Brgy Apopong ning siyudad, human niini giunahan ang kapulisan ug pusil hinungdan nga walay laing nahimo ang mga otoridad kundi mubalos.
Matud sa labaw sa RPDEU0-12 nga si Col. Maximo Sebastian Jr, si Climaco usa ka high-value target level 1, ug naapil sa presidential drug list, ug gikonsiderang usa sa mga notorius drug pusher sa siyudad.
Kagahapon atul sa raid, narekober sa iyang posisyon ang usa ka caliber 45 pistol, mga bala ug 3 sachet sa shabu.
Kahibaluan nga mipalag ang pamilya ni Climaco, ug gihingusgan nga may iregularidad sa gipatuman nga operasyon sa mga otoridad.
Apan gihingusgan ni Col. Sebastian nga na-validate kini pag-ayo sa ilang intelligence community una ang implementasyon sa naasoy’ng operasyon.
Samtang, ang mga nasikop mao silang Jamil Agustin nga nakuhaan ug calibre 38 nga armas, ug si Peter Villarosa nga nakuhaan ug usa ka pakete nga gituuhang marijuana. Ang duha ang pulos residente sa Brgy Labangal.
Samtang nagpabiling at-large ang silang Jimmy ug Jason Masayon sa nasampit gihapon nga barangay, human nakuhaan ug usa ka caliber 38 nga may mga bala, ug upat ka sachet sa shabu.
Gisulod usab ang panimalay kagawad sa Brgy Bawing, apan nagnegatibo. Giandam na ang mga kasong atubangon sa mga target sa raid nga nagpositibo sa mga kontrabando.
