GENERAL SANTOS CITY – Sikop ang usa ka newspaper reporter human ang gipahigayong drug entrapment operation sa Lagao Police Station ug mga sakop sa Philippine Drug Enforcement Agency-12.
Giila ang dinakpan nga si Richard Cordova Basillo, 42 anyos, residente sa Blk 4 Brgy City Heights ning dakbayan, ug gatrabaho sa Punto Newspaper.
Gipahigayon ang operasyon alas-7:10 kagabii sa usa ka inn sa national highway Brgy Lagao, kung asa malampusong napalitan sa pulis nga nagpailang poseur buyer ang suspek ug usa ka sachet sa shabu sa kantidad nga P500.
Karong adlawa gilaumang mapasang-at ang kasong pagsupak sa section 5 kon pagbaligya sa RA 9165 kon Comprehensive Dangerous Drugs Act of 2002 batok sa suspek nga kasamtangang balhug sa PDEA-12 detention facility.
