Nanawagan si Parañaque 2nd District Rep. Brian Yamsuan nga himuong regular ang inspeksyon ug maintenance sa mga infrastructure project sa gobyerno aron masiguro nga luwas, lig-on ug de-kalidad gihapon kini.
Sa House Bill 9780, gisugyot ni Rep. Yamsuan nga magpahigayon ang Department of Public Works and Highways o DPWH og inspeksyon matag lima hangtod 10 ka tuig human makompleto ang usa ka proyekto.
Matud ni Yamsuan, importante ang regular nga physical inspection tungod kay mahimong maapektuhan ang kalig-on sa mga proyekto sa grabeng panahon, sobra nga karga ug uban pang mga hinungdan.
Gitumong usab sa sugyot nga masulbad ang problema sa mga karaang proyekto nga wala mamintina tungod sa mga isyu sa pagpanag-iya sa yuta.
Ubos sa sugyot, ang tag-iya o legal nga naggamit sa lugar kinahanglan motugot sa gobyerno nga mohimo og inspeksyon, maintenance, pag-ayo o rehabilitation.
Ang mosupak o dili makatarunganong magdumili sa access mahimong mamultahan og hangtod ₱50,000.
Sumala ni Yamsuan, tumong sa sugyot nga mapanalipdan ang bilyon-bilyong pondo sa katawhan ug masiguro nga mapuslan sa dugay nga panahon ang mga proyekto sa gobyerno.
